ਨੋਵੇਲਾਰਾ (ਕੈਂਥ)- ਰੈੱਡ ਕਰਾਸ ਨੋਵੇਲਾਰਾ ਵੱਲੋਂ ਆਪਣੀ ਸੰਸਥਾ ਦੇ 40 ਸਾਲ ਪੂਰੇ ਹੋਣ 'ਤੇ 40ਵੀਂ ਵਰ੍ਹੇਗੰਢ ਮਨਾਈ ਗਈ। 40ਵੀਂ ਵਰ੍ਹੇਗੰਢ ਮੌਕੇ ਕੀਤੇ ਸਮਾਗਮ ਵਿੱਚ ਰੈੱਡ ਕਰਾਸ (ਕ੍ਰੋਚੇ ਰੋਸਾ) ਨੋਵੇਲਾਰਾ ਦੇ ਵਿਸ਼ੇਸ਼ ਸੱਦੇ 'ਤੇ ਗੁਰਦੁਆਰਾ ਸਿੰਘ ਸਭਾ ਨੋਵੇਲਾਰਾ ਦੀ ਪ੍ਰਬੰਧਕ ਕਮੇਟੀ ਵੱਲੋਂ ਸ਼ਿਰਕਤ ਕੀਤੀ ਗਈ। ਇਸ ਮੌਕੇ ਪ੍ਰਬੰਧਕ ਕਮੇਟੀ ਵੱਲੋਂ ਸੰਗਤਾਂ ਦੇ ਸਹਿਯੋਗ ਨਾਲ ਰੈੱਡ ਕਰਾਸ ਦੇ ਵਾਹਨ ਖਰੀਦਣ ਲਈ 5 ਹਜ਼ਾਰ ਯੂਰੋ ਦੀ ਰਾਸ਼ੀ ਦਾਨ ਕੀਤੀ ਗਈ। 

ਇਸ ਦੌਰਾਨ ਨੋਵੇਲਾਰਾ ਸ਼ਹਿਰ ਦੇ ਮੌਜੂਦਾ ਮੇਅਰ ਸਿਮੋਨੇ ਜਾਰਾਨਤੋਨੈਲੋ, ਸਾਬਕਾ ਮੇਅਰ ਏਲੇਨਾ ਕਰਲੈਤੀ, ਇਲੇਨੀਆ ਮਾਲਵਾਜੀ ਅਤੇ ਹੋਰ ਉੱਚ ਪ੍ਰਸ਼ਾਸਨਿਕ ਅਧਿਕਾਰੀ ਮੌਜੂਦ ਸਨ। ਇਟਲੀ ਵਿੱਚ ਰੈੱਡ ਕਰਾਸ ਦੀ ਨੀਂਹ ਮਿਲਾਨ ਵਿੱਚ 15 ਜੂਨ 1864 ਵਿੱਚ ਰੱਖੀ ਗਈ ਸੀ, ਜੋ ਕਿ ਲੜਾਈ ਦੌਰਾਨ ਜ਼ਖਮੀਆਂ ਅਤੇ ਬਿਮਾਰਾਂ ਦੀ ਸਹਾਇਤਾ ਲਈ ਸ਼ੁਰੂ ਕੀਤੀ ਗਈ ਸੀ। ਸੰਸਥਾ ਵੱਲੋਂ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਸਿੱਖ ਭਾਈਚਾਰੇ ਦਾ ਸਮਾਗਮ ਵਿੱਚ ਭਾਗ ਲੈਣ ਅਤੇ ਸਹਾਇਤਾ ਰਾਸ਼ੀ ਦੇਣ ਲਈ ਧੰਨਵਾਦ ਕੀਤਾ ਗਿਆ। ਆਪਣੀ 40ਵੀਂ ਵਰ੍ਹੇਗੰਢ ਮੌਕੇ ਰੈੱਡ ਕਰਾਸ ਨੋਵੇਲਾਰਾ ਨੇ ਦੋ ਹੋਰ ਗੱਡੀਆਂ ਦੀ ਮਨੁੱਖਤਾ ਦੇ ਭਲੇ ਲਈ ਸੇਵਾ ਸ਼ੁਰੂ ਕੀਤੀ ਹੈ।